صدر قانون ضريبة القيمة المضافة و كالعادة دخلنا في مناقشات و جدليات في التطبيق. أكننا أول بلد يطبق فيها القانون و بدأنا نخترع و نألف طرق التعامل مع القانون ده. موزعين كروت المحمول عملوا المعتاد و أخفوا الكروت علي أمل مكسب سهل و سريع من فرق السعر بين الكروت قبل الضريبة و بعد الضريبة. الحكومة ممثلة في وزارة المالية و المرفق القومي للإتصالات و جهاز حماية المستهلك دخلوا في الخناقة و حاولوا يفكروا برة الصندوق و يدوروا علي حلول غير تقليدية تتمثل في تحمل المستهلك جزء من الضريبة بزيادة في سعر كروت الشحن و تتحمل الشركات بزيادة الدقائق. إختراعات و إجتماعات لمشكلة أكيد غيرنا حلها.
طيب ما نفكر شوية، غيرنا عمل إيه؟ هل فيه حلول غير اللي إتعمل.
أنا شخصياً مقتنع إن الحل السها و الممتنع هو إن كارت الشحن يكون سعر بيعه هو السعر اللي مطبوع عليه. يعني كارت المائة جنيه يتم بيعه بمائة جنيه و كارت الخمسين يتم بيعه بخمسين جنه و هكذا. طيب و الضريبة؟ يتم حسابها علي كل خصم من الرصيد، يعني مثلاً، مكالمة مدتها ٥ دقائق سعرها ١٩ قرش للدقيقية يتم خصم ٥ في ١٩ قرش مضاف عليها ٨٪ ضريبة جدول و ١٣٪ ضريبة قيمة مضافة يبقي ١١٧ قرش يخصم من الرصيد. كدة يبقي في أي وقت يتم تغيير الضريبة يتم الخصم من الرصيد علي السعر الجديد بدون حاجة لتعديل سعر كارت الشحن أو الدخول في كل التعقيدات و الإختراعات اللي عملناها.
طيب إيه المميزات الأخري للحل ده؟
١. ينفع تطبيق ضرائب مختلفة علي حسب نوع الخدمة. يعني مثلاً بالطريقة المعمول بها حالياً يتم تطبيق نفس الضريبة علي دقائق المحمول و الرسائل و خدمات الترفيه مثل الرنات و الأغاني و حتي التبرعات!!! يعني اللي حاطط رنة لأغنية حناخد منه ضريبة زي اللي بيتبرع بخمسة جنيهات لمستشفي سرطان الأطفال. الطريقة المقترحة تخلينا نقدر نحط ضريبة أعلي علي الأغاني و نعفي التبرعات. سهلة مش كدة؟
٢. لما يتم تغيير سعر الضريبة لازم نغير سعر الكروت و يصبح كل مكتنز لكروت في وضع يحقق فيه ربح سريع. طيب ما نحمي الناس من الأستغلال ده؟ و يكون تغيير الضريبة من قيمة الخصم من الرصيد و يكون تاريخ موحد للناس كلها. يعني السنة الجاية لما يكون سعر الضريبة ١٤٪ بدل ١٣٪ ، أنظمة الخصم الساعة ٠٠:٠١ من يوم ٢٠١٧/٧/١ تخصم من الرصيد بالسعر الجديد و خلاص. سهلة و مفيهاش تغير أسعار كروت أو فرص إستغلال.
حبيت بس أكتب التدوينة دي كمثال للتعقيدات اللي عمالين نعملها في نفسنا. الحلول السهلة موجودة بس اللي يدور.
