بقالي مدة مش فاهم ليه عمالين ندور حوالين نفسنا في دوائر مفرغة.
بقالنا كذا سنة، كل الساسيين و النخبة شغالة إما معارضة أو تطبيل. مفيش حد مقدم رؤية متكاملة للبلد. النظام الحالي شغال علي قدم و ساق في بنية تحتية هامة جداً و لكن بعد كدة البلد حيبقي شكلها إيه؟ يعني الإقتصاد ده حيقوم علي إيه؟ فين الميزة التنافسية؟ إيه الصورة الزهنية اللي تيجي لأي حد لما يسمع إسم مصر؟ يعني مثلاً ألمانيا معروفة بالصناعات الحديثة و الجودة العالية جداً. الصين معروفة إنها بلد صناعي كبير جداً عندهم إمكانيات إنتاجية لكميات كبيرة بسعر رخيص جداً. إحنا بقي حنبقي معروفين بإيه؟ إيه السمة المميزة لنا؟
نفكر كدة. هل ممكن ننافس الصين في القدرة الإنتاجية أو السعر؟ هل ممكن ننافس أمريكا و أوروبا في إنتاج القمح مثلاً؟ الناس دي القمح عندهم بيتروي بالمطر، يعني ببلاش. إحنا ننافس إزاي؟
طيب إيه المميزات اللي عندنا؟ موقع جغرافي، بشر، و مقومات سياحية. طيب نستغل ده إزاي؟ فيه أي حزب أو كيان أو أفراد عملوا مجهود أو رؤية في هذا الموضوع؟ طبعاً لا. مفيش حد عمل المجهود المطلوب. كله بيتكلم في سكة إننا عارفين المشاكل، اللي في الغالب كله متفق عليها لكن إيه الحلول و إيه الرؤية؟ مفيش. كل الكلام في إتجاه “نحكم و إحنا حنحل”!! علي أساس إنهم مثلاً خايفين اللي في السلطة ياخد الكلام و ينفذه و ينجح و النجاح ينسب له. الوضع أخطر من كدة بكتير. اللي عنده حلول و رؤية يطرحها. لو صانع القرار أخذ بها يبقي تمام و ساعدنا البلد، لو النقاش طلع الرؤية غلط يبقي يا دار ما دخلك شر، لو الكلام مظبوط و لم يتخذ به يبقي علي الأقل عملنا اللي علينا و ما بخلناش علي البلد بالفكر و المجهود ، لعل و عسي يجي يوم حد يشوف الحلول و ينفذها. أياً كان اللي في السلطة، الصح إن اللي عنده مقترح أو فكر ممكن يساعد البلد يقوله.
أنا قررت أبدأ بنفسي. التدوينات التالية حطرح فيها رؤيتي الخاصة و أرجو التفاعل معها و مناقشتها يمكن يطلع منها حاجة.
